ኤጄንሲዉ የመጀመሪያውን 2.2 ሚልዮን ዶዝ የኮረና ቫይረስ ክትባት መረከቡን ገለፀ

March 8, 2021Featured NewsNews

የኢትዮጵያ መድኃኒት አቅራቢ ኤጀንሲ በጤና ሚንስቴር በኩል የመጣውን 2.2 ሚልዮን ዶዝ የኮረና ቫይረስ ክትባት ከኢትዮጵያ አየር መንገድ በመረከብ በዋናው መ/ቤት የቅዝቃዜ መጋዘን ማከማቸቱን በኤጀንሲው የመድኃኒት አና ህክምና መገልገያ መሳሪያዎች ክምችትና ስርጭት አስተዳደር ዘርፍ ም/ ዋና ዳይሬክተር የሆኑት አቶ ተስፋዓለም አድራሮ የካቲት 28 ቀን 2013 ዓ.ም ገለፁ።

በኮቫክስ ዓለም አቀፍ ጥምረት የተገኘው 2 ነጥብ 2 ሚሊየን ዶዝ የኮሮና ቫይረስ ክትባቶችን በፍትሃዊነት ለማሰራጨት እንደሚሠራ ነው የተገለፀው።

የመከማቻ ሁኔታዎቹን በተመለከተ(Storage Condition) ከሌሎች ከትባቶች የማከማቻ ሁኔታ ጋር የሚመሳሰል በመሆኑ ከ 2 እስከ 8 ድግሪ ሴንቲግሬድ ማቀዝቀዣ ክፍል እንደሚቆዩ እና ተገቢዉ ክትትል እንደሚደረግላቸዉ ተናግረዋል።

ኤጀንሲው ለስራው ልዩ ትኩረት በመስጠት ማቀዝቀዥያ የተገጠመላቸው ተሽከርካሪዎችን በመጠቀም ክትባቱን በመላ ሀገሪቱ እንደሚያሰራጭ አክለው ገልፅዋል ።

አወል ሀሰን