የመድረኩ ዋና ዓላማ የEPSS የ3 ዓመት ስትራቴጂክ ዕቅድን ከፌዴራል የጤና ዘርፍ የልማትና ኢንቨስትመንት ዕቅድ ጋር ማጣጣም እና በሁሉም የሥራ ክፍሎችና በ19ኙም ቅርንጫፎች የሚተገበሩ የሥራ ዕቅዶችን በማዘጋጀት ወደ ሙሉ ትግበራ ማሸጋገር ነው።
ዕቅዱ የመድኃኒት ግዥና አቅርቦት፣ የመጋዘንና ስርጭት ሥርዓት፣ የፋይናንስ ጤናማነት፣ ዲጂታል ሽግግር፣ የሰው ኃይል ልማት፣ የአደጋ ሥጋት አስተዳደር፣ ክትትልና ግምገማ፣ ተገዢነትና ኦዲትን የሚያጠናክሩ 9 ስትራቴጂክ ግቦችና 64 ቁልፍ የአፈጻጸም መለኪያዎች (KPIs) ያካተተ ነው።
በሁለተኛው የመድኃኒት አቅራቢ ልማትና ኢንቨስትመንት ዕቅድ (PSDIP II) መሠረትም ለቀጣዮቹ ሦስት ዓመታት ከፍተኛ በጀት መመደቡ ተገልጿል። በጀቱም የመጋዘን፣ የትዕዛዝ አስተዳደርና የስርጭት ሥርዓትን ለማጠናከር እንዲሁም ወደ ዲጂታል የአቅርቦት ሰንሰለት ለማሸጋገር እንደሚውል ተጠቁሟል።
የዕቅዱ ዋና ትኩረቶች የደንበኞችን እርካታ ማሳደግ፣ የፋይናንስ ዘላቂነትን ማረጋገጥ፣ ተለዋዋጭና አስተማማኝ የመድኃኒት አቅርቦት ሰንሰለት መገንባት እና ከፍተኛ አፈጻጸም ያለው የሰው ኃይል ማፍራት ናቸው።
ዕቅዱ በየደረጃው በውይይት የዳበረ በመሆኑ፣ የመድኃኒት አቅርቦት ባለድርሻ አካላትን በማሳተፍ፣ የዕቅድ ቅንጅትን (Alignment) በማረጋገጥ እና ለተግባራዊነቱ በጋራ በመረባረብ በቁርጠኝነት መሥራት እንደሚገባ ተገልጿል።
የዕቅድ ዝግጅት፣ ክትትልና ግምገማ ዳይሬክቶሬት ዳይሬክተር አቶ ፅጋቡ ገብሩ እንዳስገነዘቡት፣ ሁሉም የሥራ ሂደቶችና ቅርንጫፎች በተካሄደው የሥራ ማሳያ መድረክ መሠረት ዕቅዱን አካተው መሥራት ይገባቸዋል። በቀጣይም የዕቅዱን አፈጻጸም ለማረጋገጥ ጥብቅ ክትትልና ግምገማ እንደሚደረግ ገልጸዋል።
EPSS በ2030 በአፍሪካ ብቁ፣ ቀልጣፋና ፈጣን ምላሽ ሰጪ የመድኃኒት አቅርቦት ሰንሰለት ድርጅት የመሆን ራዕዩን ለማሳካት የስትራቴጂክ ዕቅዱን በተቀናጀና በቁርጠኝነት ለመተግበር እየሠራ ይገኛል።
#ማገልገል_ክብር_ነው