ከጥቅምት 16 እስከ 19 ቀን 2019 ዓ.ም. በሚካሄደው በዚህ መድረክ የአፍሪካ የጤናው ዘርፍ ባለድርሻ አካላት፣ አምራቾች፣ ዓለም አቀፍ አጋሮችና ባለሀብቶች እየተሳተፉ ይገኛሉ።
የጤና ሚኒስቴር ዴኤታ ዶ/ር መሉቀን አርጋው እንደተናገሩት ኤግዚቢሽኑ የገበያ ትስስርን ከማጠናከር ባለፈ ኢንቨስትመንትን ለመሳብ እንደሚያግዝ ገልፀው ፤ ኢትዮጵያም የሀገር ውስጥ አምራቾችን ለመደገፍና አዳዲስ ባለሀብቶችን ለመሳብ የኢንዱስትሪ ፓርኮችን እያስፋፋች መሆኗን አመልክተዋል።
አገልግሎቱም ከሀገር ውስጥ አምራቾች ጋር ውሎችን በመፈጸምና የገበያ ዕድልን በማረጋገጥ የአገር ውስጥ ምርትን እያበረታታ እንደሚገኝ ገልፀዋል።
የመድኃኒትና የሕክምና መገልገያዎች አምራቾች ማኅበር ፕሬዝዳንት ዶ/ር ታደሰ ተፈሪ በበኩላቸው፣ መድረኩ የኢትዮጵያን የማምረት አቅምና በፖሊሲ ዘርፍ እየተሠሩ ያሉ ሥራዎችን ለአፍሪካና ለዓለም ለማስተዋወቅ፣ እንዲሁም አዳዲስ ኢንቨስትመንቶችን ለመሳብ ትልቅ ዕድል እንደሚፈጥር ተናግረዋል።
በኤግዚቢሽኑ ዓለም አቀፍ የጥራት ደረጃን የጠበቁ የሕክምና ግብዓቶችን ለማምረት የሚያግዙ አዳዲስ ቴክኖሎጂዎችና የምርምር ውጤቶች የቀረቡ ሲሆን ፤ የኢትዮጵያ መድኃኒት አቅራቢ አገልግሎትም በመድረኩ ላይ የተቋሙን ሥራዎችና ለሀገር ውስጥ ምርት ዕድገት ያለውን ድጋፍ እያስተዋወቀ ይገኛል።
#ማገልገል_ክብር_ነው!